【 #JARvelogue周遊學・日劇老是常出現「特別出演」的真正意思】
之前有朋友問，日劇中演員名單中成日會出現「特別出演」呢個詞，到底係點解？得呢個演員先特別？定係中文嘅「友情客串」咁解？今次一次過解答！好似最近日本好紅嘅《半澤直樹2》中飾演行長嘅北大路欣也，就正正喺呢套劇中被列為「特別出演」。
「特別出演」其實係指一啲著名或者有地位嘅演員，喺成套劇入面只客串其中一部份，甚至可能得一集有佢份，呢個情況，就會喺演員表中列為「特別出演」，而「特別出演」嘅排名亦多數會被排到最後先出。至於呢個做法，最主要嘅原因其實係為表示禮貌。當一位有地位嘅著名演員去演配角，甚至係客串幾個鏡頭時，列明「特別出演」可以顯示佢雖然係主角級嘅演員，但今次要特別屈就佢客串由後輩主演嘅劇集嘅意思。
總括而言，「特別出演」係專指大前輩演員去客串後輩嘅劇集時所用到，但要留意返，呢個用法唔等同中文嘅「友情客串」，「友情客串」嘅日文係「友情出演」，係指導演、主角或者同主角同一間公司嘅演員朋友參演，有時甚至係演員自願性演出。「特別出演」同「友情出演」最大嘅分別就係，前者嘅片酬係同平時冇分別，但後者因為係友情價，所以片酬相對會較少，有時甚至可能係免費添！以後睇日劇嘅時候，可以留意下有冇「特別出演」或者「友情出演」，睇下邊個係大前輩，邊個係拍膊頭黎參演喇！
最後有個小小小知識，就係日文中嘅「出演」同「演出」，其實有好大分別，以上講嘅「出演」，係指中文嘅演出／參演，而日文「演出」係導演(動詞用) 咁解，兩者差好遠㗎！
#JARvelogue
#日本冷知識
#解答問題時間
#繼續圖文不符
#我諗大家都慣咗哈哈
Search